Eustat

Ohar metodologikoa: Txikizkako Merkataritzaren Indizea (BMIt)

BMIt. Ohar metodologikoa

EUSKAL AUTONOMIA ERKIDEGOKO TXIKIZKAKO MERKATARITZAREN INDIZEA (BMIt). 2005EKO OINARRIA

Euskal Autonomia Erkidegoko Txikizkako Merkataritzaren Indizeak (BMIt) koiunturazko adierazlea da, eta helburutzat du, Euskal Autonomia Erkidegoko txikizkako merkataritza-sektorea nahiz haren azpisektoreak kontuan hartuta, salmenten eta langile okupatuen bilakaera neurtzea.

Lagin bidezko inkesta da, EAEn kokaturik dauden eta jarduera nagusitzat txikizkako salmenta duten merkataritza-establezimenduei egina, Jarduera Ekonomikoen Sailkapen Nazionalaren arabera (JESN-2009, 47. atala).

Lagina ez da ausazko prozesuen bidez hautatzen, baizik eta enpresa-hautaketa baten bidez, Eustatek erabiltzen duen Merkataritzaren Sektore-sailkapeneko C Sektorizazioan oinarriturik (merkataritza-sektoreko sailkapena —46. eta 47. atalak— barne hartzen duen sektorizazioa da). Behin enpresak hautatu ondoren, EAE osatzen duten hiru lurralde historikoetan ordezkapena dutela egiaztatzen da. Aipatu diren mailetako bakoitzean (JESN eta lurralde historikoak) erabiltzen den hautatze-irizpidea da estaldura jakin bat bermatzea (% 75 baino gehiago, ahal dela) C Sektorizazioko maila bakoitzean.

BMIt indizearen lagin-panelean JESN-2009, 47. ataleko enpresak baino ez daude, eta, bestalde, ez da panel itxia; izan ere, denboran zehar aldatu daiteke, enpresa batzuk hainbat kausarengatik atera baitaitezke, eta gehiago sar daitezen onartzen du. Egun 426 merkataritza-enpresak osatzen dute, eta, era berean, Barne Merkataritzaren Indizearen (BMI) barruan dago.

BMIt Laspeyres-en indize haztatua da, oinarritzat harturiko urteko datuekin kalkulatu diren haztapenetan oinarritzen dena. Halako indizeen abantaila da kalkulatzen nahiz interpretatzen errazak direla. 2008ko lehen hiruhilekoan burutu dira Txikizkako Merkataritzaren Indizearen oinarria 2000tik 2005era aldatzeko lanak. Prozesu horren barruan, erabiltzen diren haztatze-koefizienteak aldatu dira; koefizienteok Eustatek 2005. urteari buruz taxututako merkataritza-kontuen datuetan oinarriturik lortu dira.

Egin den serie-estekatzeari esker, analista zein erabiltzaileek datuen hiruhilekoen araberako jarraipena 1993tik egin ahalko dute hausturarik gabe.

Salmenta-indizeak, serie gordinaz gain, zuzenduta eta desestazionalizatuta kalkulatzen dira, TRAMO-SEATS programa baliaturik, bai prezio arruntetan bai prezio konstantetan. Langile okupatuen indizea ere desestazionalizatu egiten da. Indize guztiak bai lurralde historikoaren mailan bai sektore-mailan argitaratzen dira, eta horretarako lehen aipatu den Eustaten Merkataritzaren Sektore-sailkapeneko B eta C sektorizazioak baliatzen dira.